• 02 маусым 2023
• 1229

Қызылордалық оқушылар тұрмыстық қалдықтан түрлі бұйым жасап шығарды

5 маусым – дүниежүзілік қоршаған ортаны қорғау күніне орай Қорқыт ата атындағы Қызылорда университетінде экологиялық акция өтті.

«Қалдықтарды табысқа айналдыру» атты шарада мектеп оқушылары тұрмыстық қалдықтарды қайта өңдеп, түрлі бұйымдар жасап шығарды.

Акцияның басты мақсаты – жастарды қоршаған ортаны қорғауға тәрбиелеу, тұрмыстық қалдықтарды қайта өңдеп, бұйым жасау.

Шараға Қорқыт ата атындағы Қызылорда университетінің Басқарма төрағасы – Ректоры Бейбіткүл Кәрімова қатысты.

Акцияда оқушылар пластмасса, бөтелке, гипс, қағаз, суши таяқшалары, пакет, мата, целлофан,  қалдықтарынан кәдесый, мүсіншелер, ыдыстар жасап шығарған.

Айталық, №120 мектептің оқушысы Унзила Наржігіт  қаймақтың пластмасса қауашағынан, пакет пен қағаздан киіз үй, аксессуарлар салатын бұйым жасаған.

Ал, «Ұлағат білім ордасының» оқушысы Бірғаным Темірбай гипс, қағаз, тетрапактан керіктің мүсіншесін, банка мен суши таяқшасынан кәдесый дайындаған.

№285 мамандандырылған мектеп лицей-интернатының оқушысы Нұрислам Дімберген ағаш қалдықтарынан ертегі кейіпкерлері, жануар мен құстардың мүсінін жасаған. Қазылар шешімімен өнерлі оқушы І орын иеленді.

ІІ орынды «Ұлағат білім ордасы» мектебінің оқушысы Мейіран Құрбанбай, №120 мектептің оқушысы Еркін Жаппар иеленді.

Ал, ІІІ орынмен №235 мектептің оқушысы Сымбат Сапабек, №197 мектептің оқушысы Ұлдана Серікбай, №3 ІТ мектеп-лицейінің оқушысы Аюп Ақболат марапатталды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
e-mail: kmu.kmu@list.ru