• 04 қараша 2024
• 502

Білім көкжиегін кеңейту: Амина Лаубаеваның Бельгиядағы тәжірибесі

Қорқыт ата атындағы Қызылорда университетінің «Есеп және аудит» мамандығының студенті Амина Лаубаева шетелде оқу арқылы өзіне ашылған жаңа мүмкіндіктер мен жетістіктер туралы сұқбат берді. Ол Бельгияда білім алу арқылы оқу тәжірибесін кәсіби және тұлғалық тұрғыдан дамытуға мүмкіндік алғанын айтты.
«Бельгияда оқу маған тек білім алып қана қоймай, мүлдем жаңа тақырыптарды меңгеруге мүмкіндік берді. Мұнда алған білім елімізде әлі де толық зерттелмеген салаларды дамытуға септігін тигізеді», – дейді Амина. Оның айтуынша, шетелдік білім алу академиялық жетістікке ғана емес, елге пайдалы жаңашыл ойлар мен жобаларды енгізуге де ықпал етеді.
Кейіпкеріміздің сөзінше, шетелде білім алу тек дәріске қатысумен, кітап оқумен ғана шектелмейді. Әлемнің түкпір-түкпірінен келген студенттермен достасып, олардың мәдениеті мен салт-дәстүрін жақыннан тануға мүмкіндік алады. «Шетелдік студенттермен әрбір әңгіме – білім мен мәдени айырмашылықтармен алмасу. Мен олардың әдет-ғұрыптары мен климаттық ерекшеліктері жайлы білсем, олар біздің Қазақстанның дәстүрлерімен танысады», – дейді.

Амина шетелде оқу арқылы кәсіби дағдыларын жетілдіріп, дүниетанымын кеңейткенін атап өтті. «Мұнда мәселелерді шешудің тың әрі жаңашыл әдістері ұсынылады. Бұл менің кәсіби қабілеттерімді одан әрі шыңдай түседі».
Сабақтан тыс уақытта Бельгия университеттері студенттерге мәдени іс-шараларға белсенді қатысуға жағдай жасайды. Музей мен театрларға жиі іс-шаралар ұйымдастырылып, саяхаттау арқылы Еуропа мәдениетін тереңірек түсінуге мүмкіндік алғанын айтты. 
Сонымен қатар, Амина шетелде оқу барысында экологиялық сананың маңыздылығын ерекше бағалайтынын жеткізді. Тұрақты даму және табиғи ресурстарды тиімді пайдалану идеялары оның дүниетанымын жаңа қырынан толықтырған.
Амина үшін «Эразмус+» халықаралық бағдарламасы арқылы оқу, тұру және сақтандыру шығындарының өтелуі – кәсіби өсу мен жеке дамуға жасалған үлкен қадам. «Мен үшін оқу әрдайым бірінші орында. Жеке дамуға, жаңа білім мен тәжірибе жинақтауға үнемі құштармын. Бельгия – бұл жаңа ел, жаңа мәдениет, жаңа көзқарас  және бұл тәжірибе менің санамды кеңейтті».

Осындай бай тәжірибені бойына сіңірген Амина Лаубаева шетелде алған білімін ел игілігіне жаратуға ниетті.