• 26 желтоқсан 2022
• 1376

Білім алушылар мемлекеттік бағдарламалардың талаптарымен танысты

Қорқыт ата атындағы Қызылорда университетінің бітіруші курс студенттері  «Жастар практикасы», «Алғашқы жұмыс орны», «Ұрпақтар келісімі» мемлекеттік бағдарламалары бойынша арнайы мамандардан кеңес алды.

Жиында Қызылорда қалалық жұмыспен қамту орталығының бас маманы Жақсылық Әділет бағдарламаның талаптары туралы айтып өтті.

- Биыл оқу орнын бітірген жас мамандардың көбі мемлекеттік бағдарламалар арқылы еңбек жолын бастады. «Жастар практикасы» бағдарламасы бойынша жұмысқа орналасқан мамандар 12 ай көлемінде еңбек етіп, айына 91 890 теңге көлемінде жалақы алуда. Осы 12 ай ішінде жас маман жақсы жұмыс тәртібімен көзге түссе, тұрақты жұмысқа қабылдануы да мүмкін.

Оқу орнын бітірген соң ешқандай мекемеде жұмыс істемеген жастар  «Алғашқы жұмыс орны» бағдарламасы арқылы да қызметке тұра алады.

Осы жылы 1108 маман «Жастар практикасымен» жолдама алып, жұмысқа орналасты. Жоғарғы оқу орнын бітірген түлектер қандай мамандық бойынша білім алса да, мемлекеттік бағдарлама бойынша жұмысқа тұруға өтініш білдіре алады, – деді Әділет Алматұлы.

Айта кету керек, қазіргі уақытта студенттер арасында жеке кәсіп ашып, онлайн саудамен айналысатындар бар. Олар жеке кәсіпкер болып есептелетіндіктен, оқу орнын бітірген соң бұл бағдарламалармен жұмысқа орналаса алмайды. Өйткені, бұл – жұмыссыз азаматтарға арналған бағдарламалар. Сондай-ақ, оқу орнын бітіргеніне 3 жыл толған мамандар да бағдарламаға қатыса алмайды.

Кездесуде орталықтың бөлім басшысы Абылай Самыратов студенттердің сұрақтарына жауап беріп, бағдарламалардың ережесімен таныстырды.

Қорқыт ата атындағы Қызылорда университетінің медиа орталығы
Байланыс телефоны: 87242 26-21-34
e-mail: kmu.kmu@list.ru