• 20 қазан 2022
• 1779

Жарқын болашақ жастардың қолында

Қорқыт ата атындағы Қызылорда университетінде 25-қазан Республика күніне орай «Жарқын болашақ жастардың қолында» атты «Болашақ»  бағдарламасы түлектерімен кездесу өтті.

Жиында ғылыми жұмыстар және халықаралық байланыстар жөніндегі проректор Майнұр Бөрібаева халықаралық бағдарламаның маңыздылығы, «500 ғалым» жобасына қатысу талаптары туралы атап өтті.

Кездесуге жиналған «Болашақ» түлектері шетелде оқу үшін қалай дайындалу қажеттігін, іріктеу қалай жүргізілетінін айтып, лайфхактармен бөлісті.

- Биыл «Болашақ» бағдарламасы арқылы Белоруссия мемлекеттік аграрлық-техникалық университетінде ғылыми тағылымдамадан өттім. Ауылшаруашылығы саласына қатысты жаңа техникалық жабдықтармен, инновациялық жобалармен кеңірек танысу мүмкіндігі туындады. Қазіргі уақытта біздің елімізде қолданылатын ауылшаруашылық саласындағы техникалардың басым көпшілігі Белоруссияда жасалады. Сондықтан әріптестерімді осы университетте білімін шыңдап, тәжірибеден өтуге шақырамын, – деді «Агралық технологиялар» кафедрасының аға оқытушысы, философия докторы (PhD) Жанар Жұмаділова.

Сондай-ақ, «Кorkyt ata endowment» корпоративтік қорының директоры Маржан Базарханова қордың мақсаты мен қызметін атап өтіп, «Болашақ» түлектерін салымшы ретінде қатысуға, университеттің дамуына үлес қосуға шақырды.

Айта кету керек, кездесуге «Болашақ» бағдарламасы аясында «500 ғалым» жобасына қатысуға ниетті профессор-оқытушылар да қатысып, өзара пікір алмасты.

Қорқыт ата атындағы Қызылорда университетінің медиа орталығы
Байланыс телефоны: 87242 26-21-34
e-mail: kmu.kmu@list.ru