• 13 қыркүйек 2022
• 1878

Студенттер университеттегі музейлерге экскурсия жасады

Қорқыт ата атындағы Қызылорда университетінде  «Мұражай – елдің айнасы» атты экскурсия басталды. Алдағы уақытта институттар бойынша барлық студент оқу орнындағы музейлермен танысады.

Ел тарихынан хабар беріп, өткен ғасырды көз алдыңа әкелетін музейлер білім алушылардың танымын арттырып, ұлттық рухын оятатыны анық.

Бүгінде Қорқыт ата атындағы Қызылорда университетінде «Университет тарихы» музейі, ҚР Еңбек сіңірген гидротехнигі М.Нәлібаев атындағы су шаруашылығы музейі, «Археология және этнография» ғылыми орталығы, зоология музейі, «Спорт даңқы» музейі бар.

Университет тарихымен танысқан «Әлеуметтік жұмыс және экономика» мамандығының студенттері білім ордасын басқарған басшылар, әртүрлі жылдарда атқарылған ауқымды жұмыстар туралы пайдалы мағлұмат алды.

- Музейлерді аралау – білімімді арттырды. Өзің білім алып жүрген оқу орнының тарихымен танысу қызық әрі өте пайдалы екен.  «Археология және этнография» ғылыми орталығындағы түрлі экспонаттар – құмыралар, кітаптар, көне суреттер өткен ғасырдан сыр шертеді. Көп оқығаннан, көзбен бір рет көрген артық. Сондықтан, әрбір білім алушы міндетті түрде музейлерді көруі керекдеп ойлаймын, – деді студент Нұрсұлу Жаңаберген.

Мұражай меңгерушісі Айдана Маратқызы экскурсия кезінде әрбір залдың экспозицияларымен таныстырды. Ал, студенттер сұрақ қойып, қызықты да креативті идеяларымен бөлісті.

Айта кету керек, экскурсияның алғашқы күні «Экономика және құқық» институтының 70-тен астам студенті музейлерді тамашалады. Мұражайларға арналған саяхат 5 аптаға созылмақ.

Қорқыт ата атындағы Қызылорда университетінің

медиа орталығы