• 18 сәуір 2025
• 349

Қос диплом бағдарламасы кеңінен талқыланды

Қорқыт ата атындағы Қызылорда университетіне Сеул ұлттық ғылым және технология университетінің (SeoulTech) Президенті, профессор Дон Хван Ким бастаған делегация ресми сапармен келді. Қазақстан Республикасы Ғылым және жоғары білім министрлігі интернационалдандыру басқармасының басшысы Рауза Мендалиева, университеттің Басқарма төрағасы – Ректоры Бейбіткүл Каримова SeoulTech университетінің Президенті Дон Хван Киммен қос диплом бағдарламасын талқылау мақсатында арнайы кездесті.

Жиынға SeoulTech университетінің Президенті, профессор Дон Хван Ким бастаған делегация, сондай-ақ Қорқыт ата атындағы Қызылорда университетінің Басқарма мүшелері – проректорлар қатысты. Кездесу барысында қос дипломды білім беру бағдарламасы аясындағы нақты бағыттар талқыланды. Атап айтқанда, оқу бағдарламаларының мазмұны мен үдерісін ұйымдастыру, білім алушылардың академиялық ұтқырлығын дамыту, SeoulTech университеті тарапынан PhD докторларды даярлауға жетекшілер бекіту, ғылыми кадрлармен қамтамасыз ету және бірлескен зерттеу жобаларын іске асыру мәселелері қозғалды. Сонымен қатар, корейлік ғалымдарды тарту, профессор-оқытушылар құрамының тәжірибе алмасуы және заманауи технологияларды бірлесіп енгізу секілді стратегиялық бастамаларға назар аударылды.

SeoulTech университетінің Президенті Дон Хван Ким: “Бұл жоба аясында бізге Кореяның Білім министрлігі қолдау көрсетеді. Қазіргі уақытта шетелдік студенттер үшін халықаралық жаңа білім беру моделін дайындап жатырмыз. Жоба жүзеге асқаннан кейін магистратура мен докторантура деңгейіне көшу мүмкіндігі болады. Егер сіздер талантты студенттерді жіберсеңіздер, біз оларды магистратура мен докторантура бағдарламаларында тегін оқытуға дайынбыз,” – деп атап өтті.

Бұл кездесу екі жақты әріптестікті нығайтып, білім мен ғылым саласында жаңа белестерге шығуға мүмкіндік беретін маңызды қадам. Келісім нәтижесінде студенттер мен оқытушылар жаһандық деңгейде білім алып, халықаралық тәжірибе жинақтай алады.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru