• 25 қараша 2024
• 113

Бұрхан Баян: Шетелде білім алу кәсіби дамуыма жол ашты

Қорқыт ата атындағы Қызылорда университетінің студенті Бұрхан Баян академиялық ұтқырлық бағдарламасы аясында Польшада білім алып, еуропалық тәжірибе жинақтауда. Бір семестр бойы шетелде оқудың артықшылықтары мен ерекшеліктері, жергілікті өмір салтына бейімделу және жаңа дағдылар қалыптастыру туралы Бұрхан өз әсерлерімен бөлісті.

Польшаға алғаш барған сәтінде қобалжу болғанымен, елден бірге барған достарының жанында болуы оған үлкен қолдау болған. Ең ерекше есте қалған оқиғаларының бірі – Варшавадан Лодзь қаласына жетіп, жатақханаға өздері орналасқан сәт. Бұл олардың алғашқы жетістігі болған.

Бұрханның айтуынша, Польша студенттерімен қарым-қатынасы жақсы қалыптасқан. Жергілікті дәстүрлердің арасында ең таңқалдырғаны – поляктардың салауатты өмір салтын ұстануы және өздеріне уақыт бөлуге аса мән беруі. Олар бос уақыттарын саябақтарда серуендеумен, велосипед тебумен, үй жануарларын серуендетумен өткізеді екен.

Сабақтан бос уақытында Бұрхан жатақханадағы студенттермен футбол, волейбол, теннис ойындарын ұйымдастырады. Сонымен қатар, Польша Тәуелсіздік күніне арналған іс-шараларға қатысып, жергілікті халықтың бейбіт өмірді жоғары бағалайтынын байқаған. Бұл мерекелер оның бойында патриоттық сезімді күшейткен.

Бұрханның байқауынша, Польша мен Қазақстанның ұқсас тұстары бар. Мысалы, Польшада бұрынғы коммунистік елдерге тән тұрғын үйлер үлгісін көруге болады, бұл Қазақстанның кейбір қалаларын еске түсіреді. Алайда Қазақстан цифрландыру бойынша алда келеді: банк қызметтері мен көлік сатып алу сияқты қызметтер жылдамырақ және қолжетімді.

Шетелде білім алу барысында Бұрхан жол табу, уақытты тиімді басқару және ағылшын тілін жетілдіру дағдыларын қалыптастырған. Сонымен қатар, ол поляк тілін үйренуді жоспарлап отыр. Алдағы уақытта әлемдік білім мен тәжірибені игерген маман болуды мақсат еткен ол бос уақытын кітап оқуға және семинарларға қатысуға арнайды.

Польшада алған білімі мен дағдыларының болашақта Қазақстанға пайда әкелетініне сенімді Бұрхан: “Еуропалық стандарттарға сай білім алу, ағылшын тілін жетілдіру және мәдениетаралық тәжірибе жинақтау – менің кәсіби дамуым үшін үлкен мүмкіндік. Бұл білімімді келешекте мамандығыма байланысты жастарға үйретемін”, – дейді.