• 25 қараша 2024
• 155

Цифрлық білім: тәжірибе және перспективалар

Қорқыт ата атындағы Қызылорда университетінде Манат Жайлауованың 60 жылдық мерейтойына арналған «Цифрлық кеңістік жағдайында заманауи психологиялық-педагогикалық білім берудің өзекті мәселелері: тәжірибе және перспективалар» атты халықаралық ғылыми-тәжірибелік конференция өтті.

Манат Жайлауова - педагогика ғылымдарының кандидаты, доцент, Халықаралық педагогикалық білім беру ғылымдары академиясының және Қазақстан педагогикалық ғылымдар академиясының корреспондент-мүшесі. Шараға еліміздің жетекші жоғары оқу орындарының ғалымдары, шетелдік зерттеушілер, докторанттар, магистранттар, студенттер мен Манат Жайлауованың жақындары қатысты.

Ғалымның 200-ден астам ғылыми - әдістемелік мақаласы отандық және халықаралық басылымдарда жарық көрген. Сондай-ақ, білім беру саласында жоғары сұранысқа ие 6 оқу құралының авторы. Ғылым мен білім саласындағы еңбектері үшін «Қазақстан Республикасының ғылымын дамытуға сіңірген еңбегі үшін» төсбелгісімен, ҚР Ғылым және жоғары білім министрінің және Қызылорда облысы әкімінің Алғыс хаттарымен, Қорқыт ата атындағы Алтын медалімен марапатталған.

Конференцияның ашылуында Қорқыт ата атындағы Қызылорда университетінің әлеуметтік және тәрбие жұмыстары жөніндегі проректоры Жандос Базартай сөз сөйлеп, ректордың құттықтауын жеткізді. Мерейтой иесінің ғылым мен білімге қосқан сүбелі үлесін атап өтіп, Ахмет Байтұрсынов атындағы алтын медальді салтанатты түрде табыстады.

Конференцияның пленарлық мәжілісінде отандық және шетелдік ғалымдар өз тәжірибелерімен бөлісіп, баяндама жасады.

Конференцияның қорытындысы бойынша ұсыныстарды Қорқыт ата атындағы Қызылорда университетінің Педагогика, психология және бастауыш оқыту әдістемесі кафедрасының меңгерушісі, философия докторы Бақытжамал Бекжанова баяндады.

Бұл конференция цифрлық орта жағдайында білім беру саласын жетілдірудің өзекті мәселелерін талқылау және озық тәжірибелермен алмасу алаңы ретінде жоғары деңгейде өтті.