• 18 сәуір 2024
• 937

Республикалық пәндік олимпиада өтті

Қорқыт Ата атындағы Қызылорда университетінде «Археология және этнология» бағыты бойынша Республикалық пәндік олимпиада өтті. 

Олимпиадаға еліміздегі «Археология және этнология» білім беру бағдарламалары бойынша мамандар даярлайтын Л.Н. Гумилев Евразия ұлттық университеті, Қорқыт Ата атындағы Қызылорда университеті, Қожа Ахмет Ясауи атындағы Халықаралық қазақ-түрік университеті, Е.Букетов атындағы Қарағанды университеті, Әл-Фараби атындағы Қазақ ұлттық университетінің командалары қатысты.

Пәндік олимпиада командалардың өзін таныстыруы, пәндік тест және ғылыми жоба қорғау бойынша үш кезеңнен тұрды.

Олимпиада қорытындысы бойынша Л.Н. Гумилев Евразия ұлттық университетінің «Ақышев ізбасарлары» командасы 1-орынды жеңіп алды. Жетекшісі З.Ибадуллаева. Е.Букетов атындағы Қарағанды университетінің «Әуселе» командасы 2-орынды, жетекшісі Ә. Мәкен және Әл-Фараби атындағы Қазақ ұлттық университетінің «Қара шаңырақ» командасы 3-орынды иемденді. Жетекшілері С.Сағындықова, А.Есенаманова. Олимпиада барысында жеке жетістіктерімен көзге түскен қатысушыларға арнайы дипломдар мен алғыс хаттар табысталды.

Командалар университеттің Археология және этнография ғылыми орталығының көрме залымен, университет тарихы музейімен танысты. Сондай-ақ, Қызылорда қаласының көрікті жерлерін аралап, облыстық тарихи-өлкетану музейінде болды. Танымдық экскурсия Қорқыт ата мемориалдық кешенінде жалғасты.