• 22 қараша 2024
• 115

Сыртқы сараптау комиссиясы Қорқыт ата атындағы Қызылорда университетінің әлеуеті мен ресурстарымен танысты

Тәуелсіз аккредиттеу және рейтинг агенттігі - білім сапасын қамтамасыз ету бойынша жетекші халықаралық аккредиттеу агенттігі болып табылады. Ұйым әртүрлі елдерде, соның ішінде Қазақстанда ұлттық деңгейде танылған халықаралық институционалдық және мамандандырылған аккредиттеуді жүзеге асырады.
Агенттік өкілдері 19-21 қараша аралығында Қорқыт ата атындағы Қызылорда университетінде бакалавриат, магистратура және докторантура бойынша 7 білім беру бағдарламасын халықаралық мамандандырылған аккредиттеуден өткізді. Тәуелсіз аккредиттеу және рейтинг агенттігінің сыртқы сараптау комиссиясы университеттің Басқарма төрағасы-Ректорымен, проректорлармен, құрылымдық бөлімшелердің басшыларымен, институт директорларымен, кафедра меңгерушілерімен, профессорлық-оқытушылық құраммен, білім алушылармен, жұмыс берушілермен және түлектермен кездесті.

Мамандар университеттің материалдық-техникалық базасы және инфрақұрылымымен танысып, Студенттер сарайын, «Сейхун» спорттық-сауықтыру кешеніне, 5 оқу ғимаратының аудиториялық- зертханалық қорына, №5 студенттік жатақханаға, 5 корпустың оқу кабинеті мен зертханасын, басқа да оқу ғимараттарын аралады.  Сондай-ақ сарапшылар тәжірибелік базаларды аралап, дәрістер мен практикалық сабақтарға қатысып, қажетті құжаттарды зерделеді.
Агенттік өкілдері халықаралық стандарттар мен нұсқауларға сәйкес университеттің білім сапасын қамтамасыз ету мәселелерін және оқу орнында үздік халықаралық тәжірибені тарату мүмкіндігін зерделеді. Сондай-ақ, университет түлектерінің кәсіби бәсекеге қабілеттілігін қамтамасыз ету үшін қолданылатын тетіктер мен құралдарды саралады.